नेपालभाषामा लेख
Article in NEPAL BHASA (Newari Language)
This article is in DEVANAGARI script.
साभार: गोरखापत्र,
ने. सं. 1132 चौलाथ्व षष्ठि
वि. सं. 2068 चैत्र 15 गते बुधवा:
लँ तब्या यायेमा:गु थाय्
-कमलरत्न तुलाधर
स्विट्जरलाय्ण्डया नांजा:म्ह नेपाल देशया एक्सपर्ट टोनी हेगेन नेपालय् यक्व चा:हिउम्ह मनू वय्क: हे जुइमा:। टोनी हेगेनं देश दुच्छिं चा:हिला: नक्सा दयेकेगु व फोटो कायेगु लिसें थाय्थासय् अध्ययन न या:गु ख:। नेपा:मितय्सं थ:गु देश म्हससीकेत वयागु सफुपाखें यक्व: ग्वाहालि कायेगु या:।
खुइदँ न्ह्य: टोनी हेगनं नेपालया गांगामय् गथे खंगु ख: यक्व थासय् आतक अथे हे तिनि। उलि ईया दुने शहरय् न्हून्हूगु मोटर, तत:जा:गु छें व किसिम किसिमयागु रेष्टुराँ दयेधुंकल, तर गांगामय् धा:सा लँ जक मदुगु थाय् नं अझ यक्वं दनि। अथे हे वास: याये मखना: मनूत सिनाच्वंगु न दनि।
थौकन्हय्या जमानाय् वास: यायेगु मदया: मनूत सिनाच्वंगु दु धायेगु मछालापुसे च्वंगु खँ ख:। तसकं अविकसित अवस्थाया चिं ख:। तर देशया हामा व प्लानर धा:पिनिगु विचार स्वनिगलं पिहाँ वनेफुगु मखु। गांगामय् लँ, ताँ व अस्पताल दयेकेगु पलेसा स्वनिगलय् मोटर ब्वाकेत लँ तब्या यायेगु ज्याय् निं हथाय् चायाच्वंगु दु। देश विकास सिबें न राजधानीइ फर्माइस दयेकेज्याया योजना दयेकाच्वंगु दु।
उखुन्हु तिनि पिहां व:गु छगु समाचार कथं सिंहदरबार दुने योजना आयोगया ज्याकू यायेत भराय्खागु बिल्डिङ दनेगु प्लान दयेकूगु दु। देश विकासया ग्वसा ग्वइगु योजना आयोगयात थ:त विल्डिङ निं दनेमा:गु छु हथाय्गु ख: सीकेफुगु मखु। अथे हे बुलडोजर हया: तुरुन्ता तुरुन्त छें थुनेगु यानाच्वंगु नं अजू चायेमा:गु खँ जुल। छाय्धा:सा स्वनिग:या गुलिमछि थासय् लँ स्यनाच्वंगु दं दं दयेधुंकल, तर लँ भिंकेत धा:सा सरकार हथाय् चायाच्वंगु मदु।
अथे हे ताँ स्यनाच्वंगु दु। छगु उदाहरण कथं सिनामंगलया ताँ काय जिऊ। थनयागु ताँ दुनाच्वंगु दु, तर सरकारं ताँ भिँकेगु वास्ता यानाच्वंगु मदु। झीगु सरकारयात गबलय् छु हू वइ धाय थाकू। छगू ईलय् गुँदपाकयागु क्वालिटी चेक यायेगुलिइ तसकं मेहनत या:गु ख: थौंकन्हय् वास्ता मयाये धुंकल।
न्हापा नम्बर प्लेट व मोटरसाइकल गयाव:पिनि हेलमेट चेक यायेगु हू व:गु ख:सा थौकन्हय् सिटबेल्टया धुन चलेजुयाच्वंगु दु। गुँदपाकयागु क्वालिटी चेक यायेगुलिइ गुलि ध्यान त:गु ख: उलि हे कडा नक्सां लँ दयेकेबलय् नं क्वालिटी चेक या:गु जूसा दयेकेसात स्यनीगु मजुइगु खइ। ओभरलोड यानात:गु ट्रकं याना: पिच यानात:गु व लोहं लानात:गु लँ दच्छि मदुबलय् हे गा:गा: वनीगु जुयाच्वंगु दु।
नक्सा पास याना: छेँ दनात:पिंत दण्ड बीगु तर सुकुम्बासी धा:पिंत ध्यबा बीगु नीतिं सकसितं गजब यानाबिउगु दु। अथे हे बुलडोजर हया: छेँ थुनेगु ज्याय् सरकारं क्यनाच्वंगु इफिसेन्सी छगू स्वये मदुगु नमूना ख:। थ्व हे जोश गामय् विकास यायेगुलिइ क्यंगु जूसा टोनी हेगेनयागु देश स्विट्जरलाय्ण्ड थें च्वंकेत ई माली मखु।